Gaita grileira de catro voces de Antonio do Castro de Vilariño (Sobrado dos Monxes)

Descripción

Antonio García do Castro de Vilariño (Sobrado dos Monxes) foi un excelente constructor e o único caso que coñecemos de artesán non gaiteiro que fabricou marabillosas gaitas de fol. Esta circunstancia ten unha explicación: a Antonio probáballe as gaitas Manuel Lago Sánchez, de Casa Nova (Carelle, Sobrado dos Monxes), un dos mellores gaiteiros que temos coñecido. As súas gaitas acadaron unha enorme sona nas comarcas de Arzúa e Terra de Melide. Nós puidemos mercar unha delas hai xa moitos anos, podédela ver na imaxe principal. Ofrecémosvos a súa réplica que podedes ver na galería feita en buxo tinguido. Trátase dunha gaita típica destas comarcas, unha gaita de catro voces, coa ronquilla e o grilleiro saíndo dun galleto, ou sexa dunha buxa dobre. Ten un son fenomenal e moi ben equilibrado. O punteiro ten a tónica preto do Mib e toca cunha escala en modo de Do coa sensible algo baixa. Pódese obter con el unha escala cromática, como poderedes ver nalgún dos vídeos que vos deixamos máis abaixo. Está deseñado para tocar coa dixitación propia desta zona, ou sexa, pechada. Este é un dos punteiros máis áxiles que temos probado, emite as notas cunha rapidez e brillo inusitados, ten un son moi potente e penetrante e requintea ben. Usa palletas como as orixinais desta zona: fabricadas coa parte exterior e dura da cana, pequenas, triangulares e con xugo metálico. 

Aquí tedes uns vídeos de diferentes melodías interpretadas coa réplica desta gaita de catro voces. Neste podedes escoitar a Muiñeira de Chantada, pois como xa vos comentamos, é posible obter con ela unha escala cromática.

Aquí tedes unha xota das que tocaba Manuel Lago.

Esta é unha das súas muiñeiras.

Por último, unha muiñeira recollida a Andrés Rodríguez das Corredoiras (Vilamaior, A Coruña), que foi un fantástico gaiteiro, un dos nosos mestres máis queridos e un estupendo amigo co que percorrimos toda a comarca de Ordes.

Compra por encomenda

Debido ás características das réplicas das gaitas de fol antigas, estas non teñen un prezo fixo asignado, que dependerá do tipo de madeira e outras características estéticas que podes escoller como anelados en diferentes materiais,  freques ou reberetados dos vestidos. Todas as réplicas de gaitas de fol teñen unha demora que depende da nosa lista de espera. Consulta con nós para saber máis.