Descripción
Antonio García do Castro de Vilariño (Sobrado dos Monxes) foi un excelente constructor e o único caso que coñecemos de artesán non gaiteiro que fabricou marabillosas gaitas de fol. Esta circunstancia ten unha explicación: a Antonio probáballe as gaitas Manuel Lago Sánchez, de Casa Nova (Carelle, Sobrado dos Monxes), un dos mellores gaiteiros que temos coñecido. As súas gaitas acadaron unha enorme sona nas comarcas de Arzúa e Terra de Melide. Aquí tedes outra das súas gaitas das que temos feito réplicas, a orixinal que vedes na fotografía pertence ao noso amigo Ricardo Caxide que nola trouxo para restaurar. Trátase dunha gaita típica destas comarcas, unha gaita de catro voces, coa ronquilla e o grilleiro saíndo dun galleto, ou sexa dunha buxa dobre. Ten un son fenomenal e ben equilibrado. O punteiro ten a tónica preto do Do e toca cunha escala en modo de Do coa sensible algo baixa. Está deseñado para tocar coa dixitación propia desta zona, ou sexa, pechada. O seu punteiro é áxil e ten un son potente. Usa palletas como as orixinais desta zona: fabricadas coa parte exterior e dura da cana, pequenas, triangulares e con xugo metálico.
Compra por encomenda
Debido ás características das réplicas das gaitas de fol antigas, estas non teñen un prezo fixo asignado, que dependerá do tipo de madeira e outras características estéticas que podes escoller como anelados en diferentes materiais, freques ou reberetados dos vestidos. Todas as réplicas de gaitas de fol teñen unha demora que depende da nosa lista de espera. Consulta con nós para saber máis.
Galego 
Español
Reseñas
Aínda non hai valoracións.