Gaita de ronquillo do Patarico de Muxía

Descripción

Réplica da gaita de ronquillo do pertenceu ao gaiteiro alcumado “O Patarico” de Muxía (A Coruña), propiedade de Ricardo Caxide. Trátase dunha gaita probablemente moi antiga e foi bastante usada. O punteiro está fabricado seguramente nalgún tipo de pau santo, malia que xa ten un aspecto de ébano pois os anos volvérono completamente negro. Esta anelado en marfil e este ten una pátina moi aparente. A copa do ronquillo é tamén de marfil, sendo o único caso deste tipo que por agora achamos. Ambos materiais, pau santo e marfil, fálannos de tempos moi recuados.

O torneado do roncón ten liñas dunha elegancia que poucas veces se ve, e está realizado cunha fineza sorprendente, quen o fixo era, dende logo, un grandísimo artesán. 

A maior curiosidade desta gaita é que o punteiro tócase coa dixitación das gaitas de barquín, é dicir, para emitir o 7º e o 8º graos hai que interpoñer o dedo medio da man superior, Senón ambos saen moi altos. Por outra parte, levantar este dedo e tocar con todos os furados abertos produce un 2º grao sobreagudo. Esta curiosa dixitación condúcenos a pensar, apoiando a tese de Ricardo, de que quizais se trate dunha gaita vida do sur de Galiza. 

O son do punteiro, como podedes escoitar neste vídeo, é estupendo, empastando perfectamente coa redondez do do roncón e co ronquillo que ten un punto de suavidade fantástico. En definitiva, trátase dunha gran gaita que vos podemos fabricar se a queredes experimentar e axudar a recuperar estes sons tan nosos e característicos.